Cyflawni ein Hamcanion Llesiant

Wrth ddatblygu ein tri Amcan Llesiant newydd rydym wedi ystyried yr ystod o wybodaeth yn yr Asesiad Llesiant a'r hyn sydd eisoes ar waith yn lleol ac yn rhanbarthol. Rydym yn hyderus y gallwn, wrth gyflawni’r Amcanion hyn, ddylanwadu ar ystod eang o weithgareddau a gwasanaethau ar draws y Fro, gwneud gwahaniaeth cadarnhaol i lesiant cymdeithasol, economaidd, amgylcheddol a diwylliannol preswylwyr ac ymwelwyr, a thros oes y Cynllun y gallwn wneud y mwyaf o’n cyfraniad at y Nodau Llesiant Cenedlaethol yn unol â’r egwyddor datblygu cynaliadwy.

Dylid ystyried ein Hamcanion Llesiant a’n gweithgareddau arfaethedig yng nghyd-destun yr ystod o gynlluniau, strategaethau a gweithgareddau cydweithredol eraill sy’n digwydd yn y Fro a’r rhanbarth ehangach. Fel y manylir yn adran 7 y cynllun, Beth a Ddywedoch Wrthym, rydym wedi bod yn siarad â gwahanol grwpiau, sefydliadau a phobl o bob oed yn rhan o'r gwaith i ddatblygu'r Cynllun ac mae’r sgyrsiau hyn wedi helpu i lunio ein Hamcanion a’r camau y byddwn yn eu cymryd i’w cyflawni.

Dangosodd yr ymgynghoriad a gynhaliwyd gennym ar ein Hasesiad Llesiant fod pobl yn teimlo ein bod wedi trafod y materion cywir a bod yr Asesiad yn adlewyrchu eu profiadau o'r Fro. Yn naturiol, mae ein Hamcanion yn eang eu cwmpas, ond credwn eu bod yn creu fframwaith cadarn ar gyfer ein gweithgareddau. Maent yn adlewyrchu’r angen i ymateb i’r argyfyngau hinsawdd a natur ac yn rhoi’r cyfle i integreiddio gwaith y BGC â'r Bwrdd Partneriaeth Rhanbarthol, y Brifddinas-Ranbarth a gweithgarwch partneriaeth arall. Maent yn adlewyrchu’r hyn y mae pobl yn ei ddweud wrthym sy’n bwysig iddynt, ond hefyd ein canfyddiadau o ran annhegwch yn y Fro a waethygwyd gan bandemig COVID-19, fel yr amlygwyd yn Adroddiad Cyfarwyddwr Iechyd Cyhoeddus Caerdydd a'r Fro yn 2020 ac y gallai'r argyfwng costau byw eu gwaethygu eto. Maent hefyd yn darparu fframwaith hyblyg a fydd yn cefnogi gwaith y BGC ac yn sicrhau hirhoedledd y Cynllun dros y pum mlynedd nesaf.

 Mae pob un o’r tri Amcan yn adlewyrchu'r her sy'n gysylltiedig â'r angen i weithredu nawr, yn ogystal ag ymagwedd fwy hirdymor lle mae angen i sefydliadau ac unigolion newid ymddygiad, ynghyd â dealltwriaeth well o dueddiadau'r dyfodol ac effaith ein camau gweithredu a'n penderfyniadau.

Mae’r Amcanion hyn yn darparu fframwaith i'r BGC ac i eraill, gan gynnwys partneriaethau cyflin, er mwyn mynd i'r afael â'r problemau o flaen ein preswylwyr, a sicrhau ein bod yn parhau i gynyddu ein cyfraniad at nodau llesiant cenedlaethol hyd yr eithaf.

Mae'r diagram uchod yn dangos rhyng-gysylltedd ein tri Amcan Llesiant, a'r modd y bydd gwahanol raglenni gwaith a gweithgarwch partneriaeth yn cyfrannu at gyflawni ein Hamcanion. Defnyddiwyd y diagram hwn yn rhan o'n gwaith ymgysylltu i ddatblygu'r Cynllun drafft, ac mae'n pwysleisio'r integreiddio ar draws y gweithgareddau hyn, a phwysigrwydd gweithio tuag at ganlyniadau cyffredin ar draws y Fro a'r rhanbarth ehangach. Mae'n dangos sut y gall cymryd camau penodol mewn un maes gwaith esgor ar fuddion lluosog ar draws yr amcanion. Bydd canolbwyntio ar yr Amcanion newydd hyn, sy'n adeiladu ar Gynllun Llesiant 2018-2023 a chyfres gyntaf y BGC o Amcanion yn ein galluogi i gydweithio i fynd i'r afael â'r prif broblemau a nodwyd yn yr Asesiad Llesiant.

Manylir ar gwmpas pob amcan isod a cheir rhagor o wybodaeth am y gweithgareddau a’r prosiectau amrywiol sy’n rhan o’r camau a fydd yn cyfrannu at gyflawni’r amcanion hyn yn yr adran Cyflawni Ein Hamcanion Lles.

Cyflawni ein Hamcanion Llesiant

Fel y disgrifir drwy’r Cynllun hwn mae’r ystod o weithgareddau a gyflawnir gan y BGC ac yn gyfochr ag ef yn amrywio'n aruthrol. Er mwyn cyflawni ein tri Amcan Llesiant a mynd i’r afael â’r blaenoriaethau allweddol sy’n deillio o’r Asesiad Llesiant, byddwn yn adeiladu ar ystod o waith sydd eisoes ar y gweill, gan gynyddu momentwm lle bo angen a sicrhau bod prosiectau a gwasanaethau’n addasu ac yn newid yn ôl yr angen i gyflawni ein Hamcanion.

• Yn ogystal â hyn, rydym wedi nodi tair ffrwd waith â blaenoriaeth lle mae angen ffocws penodol:
• Ymateb i'r argyfyngau hinsawdd a natur
• Gweithio gyda’r bobl sy’n byw yn ein cymunedau sy’n profi’r lefelau uchaf o amddifadedd

Datblygu i fod yn Oed Gyfeillgar Rydym wedi cytuno ar 19 cam a fydd gyda'i gilydd yn ein helpu i gyflawni ein Hamcanion Llesiant ac yn gwella gwaith ac effaith y BGC. Mae'r camau'n torri ar draws nifer o brosiectau a gwasanaethau, a manylir arnynt isod. Mae’r camau hyn yn darparu fframwaith o’r ystod eang o weithgarwch y bydd partneriaid yn ei gyflawni dros oes y cynllun.

Bob blwyddyn, fel rhan o’r broses adrodd flynyddol, bydd y BGC yn nodi rhai o’r prif bethau i’w cyflawni ar gyfer y flwyddyn i ddod:

1. Datblygu gwell dealltwriaeth o’n cymunedau ac ymateb i’w hanghenion amrywiol, gan gynnwys y rhai sy’n byw mewn ardaloedd mwy gwledig neu ardaloedd mwy difreintiedig, i sicrhau bod gwasanaethau a chyfleusterau’n hygyrch o ran dyluniad, trafnidiaeth, fforddiadwyedd a thechnoleg, a’u bod ar gael pan fo’u hangen er mwyn atal anghenion rhag gwaethygu.
2. Cynorthwyo’r trydydd sector a hyrwyddo cyfleoedd i wirfoddoli gan gydnabod y manteision lluosog i unigolion a’n cymunedau o wneud hyn.
3. Cynyddu’r defnydd o ddata lleol, rhanbarthol a chenedlaethol a defnyddio dull sy’n seiliedig i raddau mwy ar dystiolaeth i lywio penderfyniadau a diwygio gwasanaethau ar draws gwaith y BGC gan gynnwys datblygu sylfaen dystiolaeth y BGC.
4. Defnyddio modelau fel y model 3H i gefnogi’r gwaith o feddwl yn y tymor hir a newid systemau ar draws y gweithgareddau a nodir yn y cynllun lles.
5. Cynyddu lefelau ymgysylltu ac ymwneud â phobl o bob oed, yn enwedig y rhai nad ydynt yn tueddu i ymgysylltu a’r rhai nas clywir yn aml, gan gynnwys trwy gyfrwng gweithgareddau diwylliannol.
6. Gwneud y mwyaf o gyfleoedd i gael mynediad at gyllid ac alinio gweithgareddau i gynyddu galluedd, sgiliau ac adnoddau i gyflawni blaenoriaethau yn y Fro a’r rhanbarth ehangach.
7. Ymgysylltu â’n plant a’n pobl ifanc a’u cynnwys er mwyn deall eu pryderon a’u dyheadau ar gyfer y dyfodol yn well a sicrhau bod gwasanaethau’n adlewyrchu eu barn a’u hanghenion.
8. Hyrwyddo newidiadau ymddygiad cadarnhaol a galluogi gwell dealltwriaeth o’n heffaith ar yr amgylchedd ar draws ein sefydliadau a’n cymunedau gyda ffocws ar ynni, yr economi gylchol, bwyd, bioamrywiaeth a theithio.
9. Cyflawni’r ymrwymiadau yn y Siarter Argyfwng Hinsawdd gan gynnwys datgarboneiddio ein hasedau, prosesau caffael a’n gwasanaethau.
10. Dangos arweinyddiaeth a chymryd camau i leihau amlygiad ein cymunedau i risgiau amgylcheddol, e.e. effaith tywydd eithafol a llygredd.
11. Gwella iechyd ein ecosystemau a chydnabod pwysigrwydd bioamrywiaeth a’r angen i godi ymwybyddiaeth a dealltwriaeth o’r argyfwng natur.
12. Cymryd rhan mewn dull mwy integredig o ymdrin ag ystad y sector cyhoeddus (adeiladau a daliadau tir) i wella’r gwaith o ddarparu gwasanaethau a’n gwaith yn ymwneud â’r newid hinsawdd a natur.
13. Gwella iechyd a lles ar draws y Fro gyda ffocws arbennig ar waith atal a lefelau gweithgarwch corfforol, deiet, y nifer sy’n cael brechlynnau a gwaith sgrinio.
14. Mynd i’r afael ag annhegwch iechyd fel rhan o raglen waith integredig a chydweithredol, gan sicrhau mwy o ymgysylltu a dull ataliol sydd wedi’i dargedu’n well i gyrraedd y rhai sydd â’r angen mwyaf.
15. Gweithio mewn partneriaeth i wneud y Fro yn fwy oed gyfeillgar, gan sicrhau bod gan bobl hŷn fynediad i’r gwasanaethau, y cymorth a’r cyfleoedd cywir yn lleol a’u bod yn gallu cymryd rhan mewn gweithgareddau a digwyddiadau, yn gallu dylanwadu ar ddyluniad gwasanaethau a gwella lles.
16. Darparu gwybodaeth a chymorth i helpu’n cymunedau a’n staff i ddelio ag effeithiau costau byw, e.e. y cynnydd yng nghostau bwyd, ynni a theithio.
17. Gwneud y mwyaf o gyfleoedd trwy raglenni gwaith a ffrydiau ariannu presennol i fynd i’r afael ag annhegwch a gwella cyfleoedd i’r rhai sy’n byw mewn ardaloedd difreintiedig, e.e. Dechrau’n Deg a rhaglenni cyflogadwyedd a hyfforddiant.
18. Ymgysylltu â’r gymuned a mapio asedau i ddeall ein cymunedau mwyaf difreintiedig yn well a chynnwys y bobl sy’n byw yno a’r sefydliadau lleol er mwyn nodi cyfleoedd ar gyfer newid a gwelliant.
19. Cefnogi gwaith i fynd i’r afael â thlodi bwyd gan gydnabod y cysylltiad agos â lles amgylcheddol ac iechyd a chodi ymwybyddiaeth ohono.

Mae’r tudalennau canlynol yn rhoi esboniad pellach ynghylch sut y cyflawnir y camau uchod, a'r ystod o wasanaethau a phrosiectau a fydd yn cyfrannu at gyflawni ein tri Amcan Llesiant. Darperir rhagor o wybodaeth am y meysydd gwaith canlynol a fydd yn ffocws allweddol i’r BGC.

• Ymateb i'r argyfyngau hinsawdd a natur
• Gweithio gyda’r bobl sy’n byw yn ein cymunedau sy’n profi’r lefelau uchaf o amddifadedd
• Datblygu i fod yn Oed Gyfeillgar